Eguzkiarengatik, surfarengatik eta harearengatik ezaguna, Gold Coastek 57 kilometroko kosta du. Mende baino gutxiagoan, kostako herrixken segida bat izatetik munduko helmuga turistiko famatuenetakoa bihurtu da hiria. Hein handi batean, munduko surflariek gehien atsegin duten helmuga gisa ezagutzen delako izan du Gold Coastek hazkunde eta arrakasta hori.
1950etik 1970era bitarteko hamarraldian, surf sektore oparoa garatu zen Gold Coasten, eta 1977rako alderdi horretan lidergoa hartzeko prest zegoen hiria; orduan, Stubbies Surf Classic txapelketa antolatu zuen Burleigh Heads auzoan. Mundu modernoko surf zirkuituaren lehen txapelketa izan zen, eta, ezin zuen bestela izan, Michael Petersonek irabazi zuen, bertako surflari mitikoak.
Ordutik, Gold Coasteko bizitzaren eta ekonomiaren funtsezko atal bihurtu da surfa. Gure urautsiak mundu osoan dira ezagunak, eta adin eta maila guztietako surflariak erakartzeaz gain, haiei esker ematen ditu gure hiriak aldiro-aldiro munduko txapeldunak: Mick Fanning, Joel Parkinson eta Stephanie Gilmore. Hiria surflari handien eta mundu osoan ezagunak diren oholgileen bizilekua da, eta maiz antolatzen dira bertan surf ekitaldi profesionalak, nazionalak nahiz nazioartekoak. Gold Coasteko surfaren historia osoa ikusteko, webgune honetara jo daiteke: surfworldgoldcoast.com/history
Gold Coastek munduko beste edozein hirik baino surflari gehiago ditu biztanleko. Izan ere, baditugu:
- 57 kilometro hondartza
- 3 surf erreserba nazional (Burleigh Heads, Currumbin eta Snapper-Kirra)
- Primerako 4 urautsi
- 500.000 biztanle baino gehiago
- Kirol-maila guztietarako surfa
- Gold Coasteko sorosle zerbitzuak urte osoan zehar zaindutako 35 hondartza
- 10 milioi bisitari urtean, batez beste
- Eta 4.000 milioi dolar gastatzen dituzte
Gold Coast munduko toki onena da surfeko ohol bat edo arropa aurkitzeko. Alokatu ohola, aurkitu ohol perfektua egingo dizun shaper aditu bat, ikasi surfa gure surf eskoletan, edo bisitatu gure surfeko saltoki ugariak: edozein baldintzetarako ekipamendu egokiena eskainiko dizute.
Gold Coast hiriaren Kirol Planaren arabera, hiriarentzat kirol estrategikoki garrantzitsuenetakoa da surfa. Ekonomia garatzeko gure estrategiaren barruan, hiriak surfaren, turismoaren eta surf ekitaldien sektoreko enpresak erakartzen jarraituko du, gure oinarri ekonomikoa dibertsifikatzeko, lan aukerak gehitzeko, berrikuntza eta ekintzailetza sustatzeko, eta nazioarteko inbertsioa eta esportazio jarduerak handitzeko.